【聲明】港生活網站並無進行電話推廣活動

「晴報員」鴻星聚餐盡興 玩遊戲抽獎贏豐富獎品

發佈時間: 2017/12/06

讀者朝早返工嘅時候,係咪好多時都會聽到好親切嘅一聲「晴報早晨」?從充滿笑容嘅「晴報員」手上攞到份《晴報》,真係特別醒晨!全賴呢班勞苦功高嘅晴報員每日遞上《晴報》,大家先可以睇到咁精采嘅內容。

呢班員工絕對係報社好重要嘅幫手。所以每到年尾《晴報》都會請晴報員食餐飯,開開心心咁玩番晚!

一年一度嘅晚宴上星期五喺觀塘鴻星舉行,一眾晴報員都打扮得靚靚咁去食飯,真係好開心呀!咁熱鬧嘅場合,黛安都好榮幸獲邀出席!當晚有超過300位晴報員參加,加上管理層同大家打成一片玩遊戲,認真盡興。

今年不但可以玩遊戲,贏咗有機會得到豐富嘅獎品,當中包括位元堂破壁靈芝孢子、Checkcheckcin米水系列同旅行收納袋等!而且今年更搞搞新意思,特別請咗街頭表演者Judas Law為大家獻唱,各位晴報員都大讚好好聽!

全晚最期待嘅就係抽獎環節,獎品超級豐富,唔止有Vitantonio便攜式攪拌機,Rasonic棒棒蛋糕機等等實用家電,仲有人氣手機Meizu M5 Note同旅行機票及住宿套票,獎品咁豐富,難怪大家都希望自己可以中獎!

當晚更特別嘉許20位優秀派報員,表揚佢哋敬業樂業嘅精神!

《晴報》仲特別準備咗一份最窩心嘅禮物福袋送俾大家,當中包括盞記贊助嘅冬茹、臘腸、杏脯,桂格贊助嘅燕麥飯,以及爽健嘅絲絨柔滑電動美甲機,真係人人都滿載而歸!黛安都覺得好窩心呀!

撰文: 黛安 消息特靈八卦公關
欄名: 八卦名利場