K11上演電競賽 選港隊參與亞運前哨戰

講到近年風靡全球嘅新興產業，黛安認為非電競運動莫屬，就連亞運都要將佢納入為項目之一！嚟緊2022年就係首屆有電競獎牌項目嘅亞運會，而K11將會贊助國家體育總局同香港電競總會，喺下個月合辦「海峽兩岸暨港澳台地區—K11電競錦標賽」作為亞運前哨戰，畀中國國家電競隊、來自香港、中華台北、同埋澳門嘅頂級隊伍熱身，激鬥《英雄聯盟》、《CS︰GO》等4個熱門遊戲！

黛安噚日聽香港電競總會主席周啟康講，今個月17號，K11露天廣場會先上演港隊選拔賽，為錦標賽選出《FIFA18》同《Clash Royale》嘅香港代表隊成員。選拔賽而家正接受緊報名，歡迎各位全職同業餘電競高手參加！屆時免費入場，有興趣嘅朋友可以同黛安一齊去觀戰同打氣啦！