【聲明】港生活網站並無進行電話推廣活動

屈臣氏義賣熊公仔 助單親人士 過溫暖聖誕

發佈時間: 2017/12/07

黛安細個嘅時候最開心可以喺聖誕節收禮物,依家每到聖誕節,當然唔少得會送禮物畀親戚朋友啦!小朋友就最鍾意可愛毛公仔,大家又有無諗過買禮物畀身邊嘅小朋友嘅同時,幫助香港有需要嘅單親兒童呢?

黛安最近見到屈臣氏店入面多咗啲熊公仔,一問之下,發現原來佢哋而家同緊香港單親協會合作,發起「屈臣氏關愛基層單親家庭慈善籌款行動」,透過義賣慈善熊公仔同埋喺各分店擺捐款箱,鼓勵大家今個聖誕一齊幫助基層單親家庭。

公關姐妹同黛安講,由即日起,只要大家喺屈臣氏購買79蚊嘅70cm熊公仔,或者129蚊嘅90cm熊公仔,屈臣氏就會喺每隻慈善熊嘅收益入面,捐出5蚊畀香港單親協會,如果係易賞錢會員,仲可以再以9折優惠價買熊公仔呀!

每買一隻 捐$5予香港單親協會

熊公仔喺大部分嘅屈臣氏分店都有得賣,黛安噚日都喺分店見到實物,公仔啲毛軟腍腍,好舒服!而且仲戴住頸巾,好有冬日氣氛,送畀小朋友做聖誕禮物一流!兩種size嘅熊公仔都有深淺兩隻色畀大家揀,啱晒各位同黛安一樣咁鍾意做善事嘅朋友。黛安已經買咗啦,你哋都一齊嚟幫手啦!

助單親人士 就業及培訓

聽番公關姊妹講,原來屈臣氏自2015年起已經同香港單親協會成為合作夥伴,鼓勵大家捐款支持香港單親協會,為基層單親人士提供家庭支援服務、心理輔導、同埋就業培訓。香港單親協會係喺90年代初成立嘅,佢哋以自強、自助、再助人為宗旨,組織同提供支援服務畀本地單親人士,黛安覺得非常值得大家支持呀!

撰文: 黛安 消息特靈八卦公關
欄名: 八卦名利場