海港城辦展覽 見證海運擴展歷史

聖誕、新年倒數，黛安都一定會去尖沙咀海港城感受氣氛，今年擴建後，海運仲搞咗個展覽，即日起至明年1月14號，會舉辦「Hong Kong's Best Living Room」海運‧擴展，展出50、60年代好多珍貴嘅收藏，同海運大廈嘅新舊面貌畀市民參觀。

海運大廈係1966年落成，60年代嘅海運大廈，黛安的確未見過。公關姐妹話，今次展覽精選咗約50張珍貴相片，展示海運大廈嘅新舊面貌、頂層新景點「海運觀點」觀景台、幾個新大樓建築特色等，而最特別係由渣打銀行借出兩款，同大廈同一年「出世」、印有海運大廈嘅紙幣，面值係100蚊同10蚊。

姐妹仲話，為咗今次展覽，特意打造咗兩個1︰200嘅海運大廈模型，分為南北兩端，畀大家可多角度觀賞大廈嘅建築外貌。