同袁詠儀再合作 鎮宇：佢食過翻尋味

2011年確診患鼻咽癌的張達明最近重返幕前，為電影《家和萬事驚》出任監製及演出，更「撮合」吳鎮宇和袁詠儀（靚靚）相隔13年再結片緣。兩人在片中有感情綫，未埋位已經有講有笑，十分有默契。

吳鎮宇、古天樂、袁詠儀及張達明等昨日到觀塘月華街公園為新片進行開鏡儀式，戲中鎮宇及靚靚飾演夫妻，問到有否親熱戲？靚靚說︰「梗係多啦！我為咗呢場戲先接㗎。」鎮宇立刻附和︰「我哋係三級片，係三級好笑，搞笑之中最好笑嗰個級別。」靚靚表示今次「出山」除了撑監製張達明外，亦希望再跟鎮宇合作，鎮宇笑說︰「個個女星同我合作完都食過翻尋味。」靚靚說︰「係呀！都幾舔舔脷㗎！」

鎮宇表示劇本是張達明多年前的得獎作品，是他向達明提出將劇本拍成電影。「依家大陸觀眾就等於我哋90年代，開始面對好多房屋等生活問題，佢哋會明白好多。」在片中飾演達明兒子的鎮宇坦言，希望達明再出來拍戲，又笑謂︰「佢個樣咁老，不過佢仲覺得自己係小生。（想佢攞獎？）想佢攞劇本獎呀！」

達明病癒演出

至於片酬方面，鎮宇說︰「佢係監製，又唔係投資，搵得佢做監製即係有好多錢啦！我好忙㗎！仲要減片酬？講唔過去啦！」至於化老人粧的張達明不諱言沒有想過參與拍攝，但是大家都說反正他的角色坐輪椅，於是就客串一下。今次更是古仔和達明首次合作，古仔表示電影是黑色幽默，反映社會上有很多荒誕離奇的事情，問到他的角色是否有得發揮？古仔說︰「同達明一齊一定有得發揮！」

採訪︰Pauline

編輯：林梓添

美術：梁政敏