黛安
黛安

銅鑼灣新日系生活百貨 Aeon Mono Mono開業有優惠

發佈時間: 2017/12/13

銅鑼灣新日系生活百貨 Aeon Mono Mono開業有優惠

銅鑼灣係香港潮流橋頭堡,黛安放工都經常會去window shopping,攞下靈感、研究下「今期流行」。最近喺京士頓街就發現咗間日系生活百貨店「ものもの」Mono Mono,唔止有多個日系大牌嘅化粧品賣,行行下仲聞到一陣醒神咖啡香味,先知道原來係有個咖啡專區,除咗有日本、意大利嘅咖啡用品賣,仲有本地咖啡品牌「IDEAOLOGY」嘅咖啡烘培工場,畀客人自選來自巴西、埃塞俄比亞、肯亞等咖啡豆整自己嘅專屬咖啡,真係啱晒黛安呢一類愛啡之人。

除咗咖啡,黛安最激賞嘅係舖頭度有勁多日本酒賣,清酒、燒酎、梅酒同果酒均具備,仲有試飲活動,同行朋友都話可以「邊行邊嗒」好愜意,且ものもの連出面好難搵嘅「日產」紅酒都有,好似100%以日本國產提子釀製、多次獲獎嘅朝日町國產紅酒同玫瑰粉紅酒都有,啱晒酒迷平日過來尋寶。

唔止人類,ものもの仲滿足埋一眾「主子」所需,係Q-PETS引入咗逾4,000種寵物商品畀一眾貓奴、汪星人爹哋媽咪慢慢揀,逛到黛安都唔捨得走。

黛安聽AEON公關姐妹講,原來「もの」嘅意思是日文嘅「物」,想畀香港人人無限的想像空間去滿足自己嘅「小確幸」。公關姐妹仲話,如果係AEON會員,可以喺收銀處換番張「折扣全日通」掃平貨;買夠299蚊或399蚊,仲有得免費攞限量版紅酒禮盒,或加199蚊換1套8隻威士忌水晶杯禮盒,聖誕想交換禮物唔使煩惱啦。

撰文: 黛安 消息特靈八卦公關
欄名: 八卦名利場