【聲明】港生活網站並無進行電話推廣活動

買套票免費入園 去海洋公園歎聖誕大餐

發佈時間: 2017/12/13

講開過聖誕,有姊妹同黛安講,年年聖誕都係去差唔多嘅酒店或者餐廳食大餐,想搵番啲新鮮感。黛安就建議想搞搞新意思嘅朋友們,聖誕節可以去海洋公園嘅餐廳,事關園方會喺23號至下月1號,每晚7點至11點免費開放海濱樂園廣場同食尚水都,指定日子仲會有海龍王餐廳聖誕大餐配免費入場套票,畀大家免費入園,享用聖誕大餐!

黛安知道,今年海龍王餐廳同冰極餐廳都會推出聖誕大餐同聖誕兒童餐,而海龍王餐廳嘅「幻彩聖誕晚餐」仲包括甜品自助餐,畀各位甜品控盡情品嘗聖誕特色甜品!另一間餐廳食尚水都亦推出多款聖誕限定菜式,例如傳統芝士火鍋、芝士焗加拿大龍蝦等,凍冰冰嘅冬天食就啱晒!

想淺嘗嘅話,水都餅店都會有聖誕薑曲奇、雲呢拿朱古力慕絲等應節食品。計黛安話,去主題樂園又玩又食就最開心!

撰文: 黛安 消息特靈八卦公關
欄名: 八卦名利場