大家樂榮獲「廣州市著名商標」證書

香港打工仔食lunch最緊要快、正、飽，黛安就經常幫襯大家樂嘅一哥焗豬扒飯啦！剛剛收到風，大家樂旗下中國內地業務，獲廣州市工商行政管理局頒發「廣州市著名商標」證書，認真可喜可賀！

公關姐妹話，要獲得呢個嘉許一啲都唔容易，必須符合《廣州市著名商標認定和管理辦法》所訂明嘅條件，再經廣州市著名商標評審委員會評審通過先叫成功。姐妹話，大家樂可以滿足到所要求嘅條件，反映咗集團本身已具備一定優勢，好似行內及公眾知名度、優良嘅產品質量、良好嘅市場信譽、穩健嘅財務狀況、廣泛嘅銷售區域，同無任何不合規嘅行為。

依家大家樂喺內地有96間分店，好快就邁向100間，真係犀利啊！