善用機械人教學 學編程提升學生自信

愈來愈多學校引入STEM教育，等學生可以動手學習，例如從砌機械人當中，學科學原理。噚日開始喺灣仔會展中心舉辦嘅「學與教博覽」，有超過300個展位同200場專題講座，內容包括STEM、融合教育、電子學習等。黛安專門去睇過，發現原來好多學校已經用緊機械人教學啦，好似東灣莫羅瑞華學校就係其中一間。

東灣莫羅瑞華學校係一間群育學校，旨在幫助有學習障礙嘅學生，提供教育同輔導服務。卓德根校長同黛安講，引入咗STEM教育後，學生嘅學習興趣同動機大大提高。佢又話，砌機械人可以令學生學識機械原理、力學等基本知識，同時提升埋佢哋嘅自信心同成功感。唔少學生以前都坐唔定，但患自閉症嘅學生，依家可以好專心咁用LEGO砌機械人，同時令佢哋心情平復。而姚文基老師就話，五年級嘅學生已經識得編程，控制機械人嘅動作，黛安覺得大家要畀啲掌聲佢哋！