中大候任校長段崇智 獲選美國發明家學會院士 表揚創新

明年1月，祖堯BB將會卸任中大校長一職。黛安知道，其實候任校長、生物醫學專家段崇智教授嘅背景都好有分量，最近仲獲選為美國發明家學會院士，表揚佢積極創新嘅精神，黛安都有恭喜佢！

美國發明家學會院士資格係學術發明家嘅最高專業榮譽，被評為美國專利發明者，係肯定咗發明家提升人類生活質素、促進經濟發展和社會福祉嘅貢獻。段教授話非常榮幸獲選︰「作為一個生物醫學科學家，目標就係憑我嘅研究和發明，解決人類所面對嘅健康問題和挑戰」。

段教授作為土生土長嘅香港人，一直專注幹細胞生物工程同再生醫學方面嘅研究，最近仲製造咗首個名為「微關節」嘅三維關節，會用作研究和測試治療關節炎疾病嘅藥物。佢話希望可以培育新一代發明家，同時帶領中大嘅研究精益求精。