二人世界歐遊 江若琳拒絕趁機造人

江若琳（Elanne）剛與男友「生煎包王子」蕭潤邦（Oscar）歐遊兩星期，兩人日前遇上大風雪險些滯留在英國，幸昨日趕得及出席醫學美容發布會。Elanne笑言今次旅行後，不會有「驚喜」給大家，認為結婚生仔應該按部就班。

江若琳昨日透露剛與男友Oscar去完荷蘭及英國旅行，回港前遇上英國落大雪，希斯路機場有多班機取消，令她一度擔心延誤返港，Elanne笑言︰「今次旅行滿足咗男友幾個願望，其中去咗佢夢寐以求嘅曼聯主場，還經歷人生第一場雪，如果因落大雪而取消航班，今次旅行真係貴過乜，好彩趕得切返嚟出席活動。」Elanne自爆旅行時每日食四、五餐，所以肥了許多。問到此行可有趁機造人？她說︰「唔會啦！啋！唔好啦。（會唔會秘婚？）唔係啦！呢啲開心嘢留番同大家分享，我哋唔會咁無義氣嘅。」

陳嘉寶新婚感疲累

新婚不久的陳嘉寶自爆在港舉行婚禮後，日前亦在廣州擺了十圍酒席，非常疲累。她笑言︰「爸爸話只係食餐飯，點知坐滿十圍！」問到可習慣人妻身份？她坦言跟婚前分別不大，不過老公添置許多廚具及電器。她又大讚新居的女設計師貼心，大部分布置都是為女主人考慮，連老公都呷醋。

採訪︰Pauline

編輯︰林梓添

美術︰梁政敏

攝影︰林良明