【聲明】港生活網站並無進行電話推廣活動

望住維港迎佳節 去會展歎豪華聖誕大餐

發佈時間: 2017/12/15

大家有無去過灣仔會展中心嘅薈景Congress Plus食自助餐?會展管理公司董事總經理梅李玉霞(Monica)噚日就請黛安同一班傳媒朋友,一齊提前食聖誕大餐慶祝,嗰度唔止有靚景,食物仲係色香味俱全,真係大滿足!

Monica話,好多人都唔知其實會展有7間餐廳,負責嘅餐飲部同事,每年都要幫手搞過百場婚宴及飯局,認真勞苦功高!今次Monica就訂咗餐廳嘅private room同大家食lunch,將場地布置到充滿聖誕氣氛,餐廳廚師仲即場教大家整薑餅人,大家都搶住學,黛安都即席學整咗一個!

開餐之前,會展西廚副行政總裁即場用來自澳洲嘅finger lime,烹調咗一個牛油果烙帶子,係個非常好嘅開胃菜。之後去自助餐區先發現,呢度樓底高、地方闊落,食物選擇非常多,有長腳蟹、鵝肝、刺身等幾十款選擇,單係甜品都有約10款。公關姐妹話,餐廳剛剛喺2014年完成大裝修,枱凳同好多布置都轉用環保物料,private room更大,最多可招呼48人。

姐妹仲話,聖誕同除夕嘅booking都已full得七七八八,佢就推介如未計劃去邊倒數嘅朋友,維港咖啡閣就有一個除夕倒數派對,時間係31號晚上10點至凌晨1點,每位250蚊再加一,酒類、甜品全部任飲任食。黛安即刻問仲有無位,聽聞依家已有200個預訂,要訂就快啲啦!

撰文: 黛安 消息特靈八卦公關
欄名: 八卦名利場