由芬蘭飛到經濟日報集團 真‧聖誕老人送祝福

「Santa Claus is coming to town」，今次「真‧聖誕老人」不單來了香港，仲到咗經濟日報集團向一眾同事送上祝福！噚日來自芬蘭聖誕老人村嘅Santa Claus，來到經濟日報辦公室，同一班同事selife之餘，仲送上親筆簽名嘅聖誕卡。黛安都有幸可以同聖誕老人近距離接觸，同大家一樣咁興奮，而聖誕老人第一句仲用普通話同大家講「聖誕快樂！新年快樂！」，好親切啊！

近排天氣凍，黛安問聖誕老人會唔會覺得凍，佢就話，芬蘭依家零下10至15度，所以佢覺得香港好warm，原來佢已唔係第一次來港，曾經去過學校、幼稚園、商場等，為香港人送上祝福，所以對香港完全唔陌生，仲覺得香港係一個好lovely嘅城市。

大家都好好奇，其實點先可以做聖誕老人？佢話自己已經做咗聖誕老人好多年，變成生活一部分，每逢聖誕節都好忙，每日都要見好多人，大人細路都有，幫佢地實現願望、派禮物、唱歌等。佢話要做聖誕老人最緊要係有一顆善良同溫暖嘅心，仲要思想正面。

咁最多人想要嘅聖誕禮物又係咩呢？佢話，一般小朋友，女仔就想要barbie公仔，男仔就想要table game。不過，佢話喺呢個普天同慶嘅日子，其實仲有好多孤苦無依嘅人，一樣需要人去關心，希望大家可以一齊用善良嘅心去溫暖他人。

今次活動搞得好成功，聽姐妹講，係由Jetour、芬蘭航空、芬蘭國家旅遊局（Visit Finland）合辦。Visit Finland嘅Aster話，今年香港人去芬蘭嘅人數估計有45%增長，特別係自由行。黛安已經好掛住聖誕老人，想即刻飛去聖誕老人村探佢呀！