【聲明】港生活網站並無進行電話推廣活動

灣仔書展下月開鑼 文青市集買好書

發佈時間: 2017/12/21

手作市集大家去得多,賣書嘅市集大家去過未?下個月6至7號就係「灣仔書展-閱讀在銅鑼灣」喇,呢個書展會喺銅鑼灣東角道、駱克道、記利佐治街、白沙道同利園山道行人專用區,以市集形式舉行,一共會有62個賣書攤位,有成22萬冊特價書畀你揀!

為咗買多啲好書,黛安已經做足功課,知道到時除咗新書會有8折之外,多間出版商都會推$10、$20同$30超抵特價書優惠,書籍種類包括親子、烹飪、心靈勵志、旅遊、小說、散文、理財、生活品味等,無論你係邊種書迷,都一定搵到心水好書。

今次書展係首次有發聲書社企參與,佢地搵咗唔少名人用靚聲演繹經典嘅香港同中國文學作品,好似金庸嘅《神鵰俠侶》,就由參演過同名影視作品嘅古天樂同李若彤聲演,聽落夠晒投入感!最新出品嘅《三國演義》更由黃秋生聲演關羽、廖啟智聲演劉備,陣容夠晒鼎盛。黛安覺得最啱買畀唔方便閱讀嘅長者或身邊嘅視障朋友,等大家都可享受「讀」書樂趣。書展開放時間係下午2點至9點,係免費入場,各位文青到時見啦!

撰文: 黛安 消息特靈八卦公關
欄名: 八卦名利場