【聲明】港生活網站並無進行電話推廣活動

新世界首置計劃 3年輕MT 好蹺助上車

發佈時間: 2017/12/22

新世界早前宣布,會喺屯門新盤天生樓(The Parkville)推出新世代首置計劃,400幾呎兩房單位首期只係44萬,黛安身邊好多想上車嘅好友都有興趣。黛安知道呢個計劃係由3位年輕嘅80、90後做幕後搞手,而且老闆新世界發展執行副主席兼總經理鄭志剛(Adrian)都好Buy,籌備短短半年就即刻推出!

依家香港樓價咁高,好多人都上唔到車,更唔使諗結婚生BB,包括呢3位年輕人,新世界發展見習行政人員(Management Trainee)郭皓琳(Macy)、吳傲楠(Kevin)同高翠宜(Winnie)。現年26歲嘅Macy已有計劃同男朋友拉埋天窗,佢本身住屯門,但眼見樓價不斷升,自己辛苦儲嘅積儲都追唔上,最頭痛係首期,「如果無屋企人幫手,應該好難上到車。」

喺一次公司聚會,老闆Adrian問到大家作為年輕人,討論下依家面對嘅困難,佢哋3個就分享咗「三個難」,就係儲首期難、供款難、雜費難,仲拋咗個初步計劃概念出嚟,Adrian聽完都話好,拍板一試。

結果由搵財政部、法律部等各部門商量到落實,本周開始終正式可接受申請!Kevin話,其實問過好多同事意見,「個計劃內容就係佢哋畀出嚟」。部分人做嘢2至3年,想要私人空間就自己出嚟租屋,但兩房起碼月租1.5萬至2萬,租完樓就無錢剩做首期;有同事工作時間較長,儲到筆首期,但永遠追唔上樓價升幅,所以又買唔到樓。

Winnie話,老闆Adrian一直都有參與,希望選址要方便年輕人返工,單位亦唔可以太細,起碼400呎以上、兩房或三房,「要住到5至10年,到生小朋友都夠住」。計劃暫時就得15伙,希望將來會推出多啲,畀更多無殼蝸牛可上車做業主啦!

撰文: 黛安 消息特靈八卦公關
欄名: 八卦名利場