海洋公園溫暖禮物 川金絲猴寶寶賀聖誕

大家仲記唔記得首隻喺香港出世嘅川金絲猴BB「樂奇」呢？貶下眼原來樂奇已八個月大啦。聖誕節就快到，黛安聽講海洋公園動物護理團隊，特別為樂奇準備咗聖誕禮物，慶祝佢首次喺公園同爸爸媽媽歡度聖誕，真係好Warm啊！

樂奇今年4月17日出世，佢嘅爸爸媽媽係來自成都動物園，分別喺2015年加入公園嘅雄性川金絲猴其其，同2012年加入嘅雌性川金絲猴樂樂。海洋公園姐妹話，樂奇大個咗好多，身體毛髮已由灰色變成淺棕色，體重亦較6月份嘅一公斤升至兩公斤，重咗足足一倍。

活潑可愛嘅樂奇更學識模仿父母嘅行為，包括自己整理毛髮同坐喺木盒上量度體重。而樂奇亦慢慢開始戒母乳，對嫩枝葉同蔬菜，譬如紅蘿蔔、甜椒等特別有興趣。充滿好奇心嘅佢仲鍾意將自己掛喺樹枝上，四處攀爬。黛安都打算趁呢個聖誕假期，去海洋公園探下佢哋一家先。