FOODSPORT捐卡路里 「集糧」樂助深水埗基層

做運動可以keep fit之餘，仲可以幫到人？黛安就知道由社企「FOODSPORT膳動衡」每月舉辦嘅「RUN ON溫社區跑」活動，參加者除咗有得跑，仲可以將消耗咗嘅卡路里，轉化做同等卡路里嘅食物，捐贈畀有需要人士，一舉兩得！

公關姐妹話，前幾日FOODSPORT就邀請長跑好手陳家豪擔任義跑員，同100名紅衣跑手一齊沿住尖沙咀海濱街跑，齊齊喺聖誕之前「集糧」，捐畀「北河同行（北河（明哥）慈善基金）」同深水埗區有需要人士。

姐妹話，FOODSPORT定期每3個月做一季，幫各區嘅食物銀行或慈善組織「集糧」，今年10月至12月，就成功幫北河同行集得629,462千卡路里嘅食物，大概相等於3,147碗飯！好厲害啊！

黛安已報定名等下次活動參加，有興趣嘅朋友可以登上FOODSPORT facebook專頁，like同follow佢地嘅最新動向啦！