陳庭欣擁抱曉治積曼冧到爆

陳庭欣（Toby）早前獲邀參與拍攝《大娛樂家》電影主題曲《This is Me》MV，她昨日在活動上分享點滴，現場更播放拍攝花絮。Toby更自爆有幸與男主角曉治積曼（Hugh Jackman）深情擁抱。

陳庭欣表示早前到英國倫敦參與MV拍攝，同場還有來自世界各地的18位藝人，她自言挑選過程相當好彩，沒有試鏡，她亦不懂唱歌，但可能因她曾在英國留學。

緊張過選港姐

Toby直指有機會參與荷里活製作，是難得的好經驗，心情比當年選港姐更為緊張，她笑說︰「去到先知要唱歌，對我嚟講唱歌都幾難，拍攝過程四日三夜，既要排舞又要練歌，同埋背熟歌詞，平時最多只係對住屋企隻鸚鵡唱歌，今次係一個好大挑戰。」

到正式拍攝時，首次見到電影主角「狼人」曉治積曼，那一刻很感動，她透露︰「對方高大、有型、靚仔，係心目中永遠嘅狼人，有一種英雄感覺，可以保護到我哋。我有同佢擁抱，可惜無人幫我影相，因為個個都掛住同佢合照。另外又同佢做咗五分鐘專訪，嗰一刻永遠留喺心裏面。」

同場的張紋嘉（Crystal）將與DJ余宜發、陳宇琛為亞視主持音樂節目《激活音樂》。她表示節目似《勁歌金曲》︰「未做過音樂節目主持，好驚唔識講嘢。」

張紋嘉擔任亞視主持

問她會否邀請HotCha隊友上節目？Crystal即說︰「會，因為出年我哋幾個會有搞作，希望可以開騷，仲諗緊出新歌，但年紀漸大，排舞都擔心體力。諗番起以前試過一日跑九個活動，要跳舞同唱歌，依家要我再做，真係會嘔。」

採訪︰Pauline

編輯：陳禮恒

美術：梁政敏