一田超市落戶葵芳 設「小京都」賣獨家甜品 26/1開幕

葵芳新都會廣場翻新之後唔止靚咗，仲多咗好多新店，其中就有即將喺今個月26號開幕嘅一田超市，到時一田仲會同商場、日本京都縣政府合作，將商場中庭變成「小京都」，帶來多個京都獨家品牌同產品，黛安收到風會有歷史悠久嘅抹茶、和菓子等嘅品牌，各位甜品控要注意啦！

噚日黛安同一田CEO黃思麗（Susanna）同埋一班傳媒朋友食飯，Susanna話葵芳店佔地1.5萬平方呎，會有大量日本優質同新鮮食材，啱晒各位「餓底」。一田知道大家對影相打卡有要求，新店開張時，新都會廣場嘅中庭仲會布置成京都老街、名勝熱點等，包保大家影到靚相！

美少女福袋 最受歡迎

1月1號係日本新年，一田仲按照傳統，推出新年福袋，畀大家將福氣帶返屋企。其中最受歡迎嘅相信非美少女戰士家居服系列莫屬，$388就買到內含家居外套、拖鞋、收納袋同襟章嘅福袋。另外仲有Sanrio、廚具、象印真空壺系列等嘅福袋，喺沙田、大埔、荃灣一田都有得賣，發售日期由即日起去到7號，有啲仲係限量發售，大家要把握時間將福袋帶返屋企喇！