黛安
黛安

中大沈祖堯卸任高歌 新校長盼團結校友

發佈時間: 2018/01/02

中大沈祖堯卸任高歌 新校長盼團結校友

新年新人事新作風。黛安上個禮拜五(12月29日)去咗中大參加晚宴,送別好受學生歡迎嘅前校長「祖堯BB」沈祖堯,當晚沈校長仲同殿堂級歌手徐小鳳一齊高歌《順流逆流》,引來全場超過400名中大職員同聲和唱,佢哋仲送咗張由幾十個師生寫嘅大型感謝卡畀校長,真係令人好感動。

接棒祖堯BB做新校長嘅段崇智噚日履新,佢傳承咗中大校長親民作風,即刻寫咗封公開信畀同學仔及校友,應承大家將來可以喺不同場合、以不同形式與師生見面,又想凝聚唔同年紀、界別同地區嘅校友,令中大嘅聲望同影響力更上一層樓,仲自勉做校長要「非以役人,乃役於人」。睇嚟段校長好快會畀學生暱稱做「崇智BB」了。

撰文: 黛安 消息特靈八卦公關
欄名: 八卦名利場