2個月無見林峯被傳分手 千語避談︰總之工作行先

24歲的吳千語（千語BB）和38歲的林峯近日又傳「分」訊，前晚千語BB現身倒數活動時，直認已兩個月沒見男友，雙方只是間中有聯絡，更稱不知道對方在除夕夜身在何方，五年「峯語戀」疑似玩完。很多花生友狠批二人年齡差距大，分手有理；有粉絲則相信他們只是低調談情護愛苗！

近日憑網劇《獨步天下》在內地爆紅的林峯，早前回港現身活動時透露，上月38歲牛一未獲女友吳千語陪伴，連生日禮物也欠奉，又表示雙方只是間中聯絡，相比以前經常被網友「野生捕獲」拍拖外遊如同糖黐豆，似乎關係已經今非昔比。

其後，有雜誌封面大字標題指女方主動提出分手，二人拖拉半年，關係撲朔迷離。前晚，身在橫店拍劇的千語BB抽空返港，到屯門出席倒數騷搵真銀，她與林峯的感情成為傳媒焦點。被問到情變傳聞，千語回應︰「其實好似佢（林峯）咁講咁樣，間唔中都有聯絡。其實圍繞我哋嘅新聞唔係結婚，就係生仔，今次傳我哋分手，總之就唔講太多。（大家努力挽回感情？）順其自然。」

唔知男友南昌迎新年

千語BB又承認已兩個月沒回港，問到與林峯可有見面，她冷冷地道︰「好似唔止兩個月，有一段時間！我連家人都沒見！」又強調會以事業為重︰「現時工作對我嚟講好緊要，無乜時間做其他嘢，總之工作為主！」

另一方面，對於有報道指她被富商追求，千語BB強調不知道，身邊也沒出現富商。

至於另一主角林峯，前晚他身在江西南昌與馬來西亞歌手戴佩妮為跨年騷任嘉賓，但千語卻聲稱只知男友不在港，但不知對方身在哪裏，令情變傳聞更添可信性。很多網民指二人的戀情「凍過水」，相信分手對雙方並非壞事；有粉絲則覺得千語及林峯各有各忙，才令外界揣測太多。

撰文︰Steven、Iris

編輯︰黃寶恩

美術︰梁政敏