$2980 8道菜 兩名廚聯手炮製 米芝蓮六星盛宴

睇到標題嘅你一定覺得好奇怪，米芝蓮最高級別唔係三星咩？何來會有六星級嘅料理？好簡單，因為黛安今次介紹嘅美饌，係由兩位三星級名廚─人稱「白松露之王」嘅Umberto Bombana，以及曾以28歲之齡打破歐洲最年輕米芝蓮三星榮譽紀錄嘅Massimiliano Alajmo聯手呈獻，非常難得！

澳門響頭炮 月中訪港

黛安所知，Alajmo出身於飲食世家，佢嘅家族於意大利帕多瓦及威尼斯擁有十間餐廳。Alajmo自93年喺酒店管理學院畢業後，一直喺家族餐廳Le Calandre幫手，仲憑住超卓嘅表現，翌年獲擢升為餐廳行政總廚，97年更為餐廳取得米芝蓮二星榮譽，02年再下一城摘下三星頭銜，紀錄保持至今，認真巴閉。

如果你都想試下佢同Bombana嘅手勢，嚟緊有機會啦！事關佢哋將於下星期四（11/1），率先喺Bombana澳門嘅餐廳獻技，再於1月14日來到香港8 1/2 Otto e Mezzo BOMBANA，合作打造兩場六星級盛宴。聽講兩位名廚將為客人提供八道精緻菜式：其中，Alajmo會以墨魚汁炮製別開生面嘅「墨魚cappuccino」，並帶來佢餐廳最受歡迎菜式──番紅花意大利飯配鱔肉及甜菜頭；而Bombana則會以手工意式餛飩來襯托矜貴嘅阿爾巴白松露，並準備以烤鹿肉配雅枝竹和冬季Melanosporum黑松露來炮製主菜，真係聽見都流晒口水。呢一餐咁精采嘅六星級佳餚每位盛惠$2,980（另收加一服務費），想品嘗的話記住盡早訂位了！