AR弓箭模擬射擊 智能遊戲添玩味

灣仔會展作為亞洲最佳會議及展覽場館，不時都會舉辦好多大型展覽，雖然唔係全部開放畀公眾參加，但係當中仍有唔少精采嘅活動。就好似噚日咁，黛安就去咗貿發局舉行嘅香港玩具展預覽參觀。呢個亞洲最大型嘅玩具貿易盛事，下星期（8-11/1）開鑼，噚日我率先睇到好多至潮至新嘅玩具，想同大家分享。

其中最令我深刻嘅，要數多款融合創新科技嘅智能玩具及遊戲，佢哋好多都利用近年大熱嘅AR、VR、MR技術，仲會結合應用程式（App）操作，增加遊戲趣味。就好似上圖呢款「ARcher Hunter狩獵者」弓箭玩具咁，玩家可透過弓嘅弦線進行拉弓、發射等動作，並以藍牙與手機上嘅應用程式配對，體驗多款持續更新嘅AR遊戲。

虛擬試衫 為公仔扮靚

鍾意扮靚嘅黛安亦對另一款「AR時尚設計師」遊戲好感興趣，玩家只需喺印有二維碼嘅紙張上塗繪出時裝設計圖樣，再利用手機上嘅應用程式掃描圖樣，就可即時睇到3D模特兒穿着該款服裝嘅效果，比起黛安以前細個就咁幫公仔換衫，呢款遊戲就過癮得多！

啲玩具咁好玩，難怪貿發局署理總裁Benjamin（周啟良）話相信本港嘅玩具及遊戲業，會繼續因為電子遊戲科技突破穩步增長，銷情或勝傳統玩具啦！相信大家亦好快會喺市面見到類似嘅新科玩意。