囡囡潮戴Baby假髮 成童年陰影 奶爸張繼聰︰等我頂上

下周四踏入38歲的張繼聰，昨晨於FB發相分享湊女樂，他替十個月大的細女張靖戴上「疑似」太太謝安琪添置的長假髮拍照，豈料囡囡勁不滿意更即場喊出嚟，阿聰及時犧牲自己將假髮戴上，炮製18年版「城市驚喜」。不少網民熱捧這位奶爸體貼又暖心，直指父愛真偉大！

近年在無綫撈得風生水起的張繼聰，原本拍劇一部接一部，不過，由於其所屬經理人公司與TVB的官司糾紛仍未完結，所以阿聰縱使甚具觀眾緣，亦受到牽連，他與同公司的欣宜慘遭無綫封殺，阿聰在本月中舉行的《萬千星輝頒獎典禮》，更連一個獎項提名也沒有，其參演的台慶劇《誇世代》於本月中播畢後，他亦將絕迹無綫。

日前阿聰攜同十歲大仔張瞻現身活動，他坦言未知何時可以再為無綫拍劇，並透露今年主力拍攝電影及網劇，他苦笑道︰「大家想睇我就睇埋呢兩個星期《誇世代》吧！」未知阿聰是否工作大減，近日他不時帶家人遊山玩水及當湊仔公，昨晨更Po了多張與囡囡的照片，打造奶爸形象。阿聰在FB發布的多張照片所見，除了幫其前世情人戴上長長假髮，他亦化身70年代最潮的長髮Band友，令張靖又喊又笑，畫面充滿愛。阿聰留言︰「原來家下好興買d（啲）Baby假髮，嚟幫d（啲）小朋友影下城市驚喜，點知依（呢）位小姐唔鍾意……為咗唔想媽咪失望，依（呢）單嘢，我頂‍ #童年陰影系列」。

戴假髮冧「女」吸正評

阿聰醜化自己𠱁囡囡，其帖文一夜間錄得1.5萬人讚好，不少粉絲戲言其長髮Look嚇親寶寶；有意見則認為這位爸爸為博愛女一笑無得頂。

另外，阿聰主演的《誇世代》於上周一至五的跨平台總收視錄得22點，力壓21點的《愛‧回家之開心速遞》及21.1點的《溏心風暴3》，成績尚可。

撰文︰Steven、Pat

編輯︰黃寶恩

美術︰梁政敏