時代廣場瓷器展 120件珍品大曬冷

黛安熱愛本地文化，銅鑼灣時代廣場公關姊妹最近有好介紹，就係有90年歷史嘅粵東磁廠，由今日（5號）起會喺時代廣場做展覽直到21號，期間會展出約120件手繪瓷器製品。

「磁」係清朝至民國通字，與瓷共義，現今日本仍沿用；而喺上世紀60至70年代，製瓷業獲得外國人重視，起初先接英國洋行訂單，後來連英軍軍團，甚至麥理浩夫人都落「柯打」。粵東幫督爺夫人畫嘅花紋好獨特，師傅並為呢隻花命名為「督花」，外銷到日本好受歡迎㗎。

人手繪瓷好考功夫，呢行嘅師傅亦愈來愈少，今次展覽就搵到廠內只餘下四位的大師傅，即場示範傳統嘅人手繪瓷構圖，大家千祈唔好錯過啦。