月中開鑼 迪士尼新春市集 歎米奇小食

鍾意香港地道小食同迪士尼嘅朋友要注意啦，因為香港迪士尼今個月中起，每日傍晚會喺園內嘅美國小鎮大街至廣場位置，設立「迪士尼新春市集」，到時會有唔同嘅戶外小食亭推出「米奇雞蛋仔」、「米奇砵仔糕」、「麥芽糖米奇多士」等小食，仲連奶茶都有得飲。將咁可愛得意嘅迪士尼卡通人物整成食物，黛安都想去selfie下！

迪士尼公關好友仲話，為咗要整出有迪士尼特色、兼且色、香、味俱全嘅香港地道小食，佢地餐飲部精心研究，大廚仲透露，佢哋專登用米奇形狀嘅脆多士，造出口感鬆脆嘅「麥芽糖米奇多士」；要成功造出「米奇砵仔糕」，大廚都試咗好幾次先成功，難度在於既要有米奇造型，又要配合紅豆口感，最後決定將紅豆放底，既有傳統砵仔糕口感，又有趣緻米奇，食到大家開開心。

迪士尼新春市集亦會配合「迪士尼光影匯」夜間巡遊，同一連串精采特別嘅活動，大家可以喺迪士尼由朝玩到晚！黛安都要即刻約朋友去感受下新春氣氛先得喇。