黛安
黛安

前英皇教師出書 名人校友自爆百厭事

發佈時間: 2018/01/08

前英皇教師出書 名人校友自爆百厭事

港島區傳統名校英皇書院,黛安記得2016年慶祝過90周年校慶,但該校退休教師梁植穎就發現,英皇書院可能有160年歷史!佢仲用咗4年時間翻查政府憲報同圖片庫等,將蒐集所得嘅資料編輯成《官立英皇書院創校160周年紀念文獻圖片集》。黛安噚日去咗呢本新書嘅發布會,仲有唔少名人校友撑場!

法官林文瀚 粉刷整蠱老師

英皇書院孕育咗唔少高官名人,好似現任高等法院上訴法庭副庭長林文瀚,以及財經事務及庫務局前局長陳家強等都係英皇校友。林文瀚仲大爆學生時期嘅頑皮事,話曾經和同學將沾滿粉筆碎嘅粉刷放喺課室門上,老師一入課室就被跌落嚟嘅粉刷整到成身粉筆碎,笑言呢啲都係開心回憶!至於陳家強,雖然只喺英皇讀咗一年預科就飛去美國讀書,但佢亦好享受英皇嘅校園生活。

現時位於西環般咸道嘅英皇書院校舍,1926年起啟用,係法定古迹,至今有91年歷史。校外紀念牌上寫住1879年創立嘅「西營盤書院」係英皇書院前身,但喺英皇書院任教逾30年嘅梁植穎,翻查資料後發現,西營盤書院嘅前身其實係1857年創立「西角書院」。佢喺書入面提到,西角書院應該先係英皇書院嘅原始祖宗學校,希望透過出書矯正書院歷史。佢仲已去信政府,要求將英皇書院嘅創校年份更正為1857年,真係出心出力。

撰文: 黛安 消息特靈八卦公關
欄名: 八卦名利場