藝壇大師開畫展 中央圖書館免費睇

黛安自細就鍾意畫畫，仲知道今個星期五至下星期三（1月12至17日），由香港一班熱愛繪畫藝術人士組成嘅「心源畫會」，會喺中央圖畫館舉行創會畫展，展出近300幅作品，有香港水彩畫研究會會長沈平及內地水彩畫壇大師陳希旦嘅作品，機會難得，一定要去取經啊！

今次嘅展覽，太古地產傳媒關係經理余似心（Maria）都有份。Maria就話有7幅喺意大利進修期間完成嘅畫作參展，包括人體素描、人像油畫同靜物油畫。雖然平日工作咁忙，佢依然keep住每個星期畫畫，認真難得。

「心源畫會」成立一年幾，已經有約60幾名會員，來自各行各業，致力推動本地藝術文化。會長伍美美仲話，嚟緊3月更獲上海「全華水彩藝術館」邀請，舉辦「慶三八─香港女畫家水彩作品聯展」，令香港嘅女畫家可以衝出香港！