黛安
黛安

黑妹示範做運動 體育節6800人參與

發佈時間: 2018/01/08

黑妹示範做運動 體育節6800人參與

黛安定期做運動,為保持最Fit體態同健康,噚日去咗青協賽馬會社區體育計劃舉辦嘅「第二屆全港青年社區體育節」。大會喺香港體育學院搞咗個團跑比賽,同首次舉辦咗「行通18區」活動,搵來港隊羽毛球一姐「黑妹」葉姵延、長跑運動員陳家豪等,一齊推廣做運動!活動仲有唔少高官名人出席,好似民政事務局局長劉江華、馬會慈善事務部主管陳淑慧及青協總幹事何永昌等。

何永昌話,今屆首次舉行嘅「行通18區」,由青年帶領小朋友到全港各區做體育活動,青年既可做義工,又可培養個人運動習慣,一舉兩得。陳淑慧就提到,馬會同多個團體合推一系列「創意體育」,為體育加入好玩元素,所以今屆體育節吸引到近6,800人參與。

青協公關好友同黛安講,體育節活動會延續到4月,會有團跑、籃球、獨木舟、花式跳繩、冰球比賽等,大家記住留意!

撰文: 黛安 消息特靈八卦公關
欄名: 八卦名利場