Audrey Ng
Audrey Ng

準備走佬

發佈時間: 2018/01/08

準備走佬

「嘩,乜你走佬都帶咁多嘢㗎?」終於畀我執好個「走佬袋」(即帶去醫院嘅物資),老公卻笑我行裝太過笨重︰「搭飛機都無你咁多行李!」「家陣我一個去、兩個返,係咁大陣仗㗎啦!」

走佬袋並唔難執,事關坊間有好多現成走佬袋出售,二、三百蚊一袋,入面包括產婦衞生巾(即加厚型衞生巾,應付產後大量惡露分泌)、網褲(用網織成嘅即棄底褲)、床墊(以防惡露滲漏弄污床單)、沖洗瓶(頭幾日唔沖涼,可用佢裝水唧向下體清洗)等。

買現成嘅走佬袋,可省卻逐件搜購嘅煩惱,但個別物資其實唔好用,尤其係「連扣裝產婦衞生巾」。話說我生完仔後,都在醫院姐姐幫助下,用過呢款衞生巾一次,但感覺唔太好。其一係塊M巾本身無黏力,好易走位;若果跟足包裝說明去着仲麻煩,因為正確使用方法係要喺M巾兩端綁上繃帶纏腰,着上去成個相撲手咁。由於我第一日經已着得唔舒服,所以第二日已改用普通加厚型M巾。

除咗上述必需品,最好帶埋拖鞋及梳洗用品入院,方便走動和清潔。Audrey亦奉勸各位媽媽,唔好諗住獨自出院,皆因生完仔個人真係好虛,縱使休息咗幾日,依然會腳步浮浮、想暈咁款;謹記帶夠出院衣物,包括外套、帽及長襪等,將自己由頭包到落腳,以免入風受寒。

另外,唔好忘記為你嘅小寶貝預備住院用嘅尿片、濕紙巾,當然唔少得出院着嘅BB衫和包被啦。

呼,望住眼前呢袋物資,心情不期然緊張起來。阿B,媽咪已經準備好迎接你啦!

(本欄逢周一刊登)

撰文: Audrey Ng 80後P牌媽咪,由懷孕280天起分享陀B湊仔歷程
欄名: B經之路