首登紅館只演1場 JW：未夠喉

王灝兒（JW）前晚首度踏上紅館，舉行《Never Too Early 2018》演唱會，雖然只開一場，舞台依然有煙火效果，就連歌衫都相當華麗，可謂不惜工本。

JW一開騷便施展渾身解數，表演苦練了三個月的人造雨中舞，被男Dancers拋來拋去後，全身濕透兼赤腳站於鋼琴上獻唱。JW在台上公開感謝舊老闆黎明帶入行，還透露曾邀請對方捧場，可惜對方在內地有演出。當晚JW邀請了關楚耀及吳業坤擔任嘉賓，還特別請來偶像鄭中基以壓軸嘉賓身份演出。鄭中基唱歌之餘也搞氣氛，當場質問她是否在《勁歌》頒獎禮中爆粗，見JW否認再追問︰「無？我本來仲諗住讚你！」JW再笑言︰「嗰次無囉。」鄭中基再抵死咁話︰「真係？我依家入去再聽多次先。」

與男友公開曬恩愛

唱到《小故事》時，JW已經忍唔住邊唱邊喊，佢哽咽地表示︰「今晚係第一場，亦係最後一場，我已經將所有畀晒你哋，多謝大家畀錢嚟聽我唱歌。」JW首次開紅館騷似乎興奮得有點忘形，台上整理紗裙時不慎走光，繼而又不顧危險跳落台，衝向坐在首行的男友Tarzan，公然握手大曬恩愛。

JW受訪時坦言演唱會只得一場實在未夠喉︰「花咗好多時間準備，但好似30分鐘就唱完咁。（只開一場公司會否蝕錢？）全公司都淨係想做好呢個騷，無諗過有無錢賺。」

撰文︰Pauline

編輯：林梓添

美術：招潤洪