黛安
黛安

渣打出迪士尼銀行卡 送復刻錢罌

發佈時間: 2018/01/09

渣打出迪士尼銀行卡 送復刻錢罌

一個靚錢罌係小朋友儲錢嘅「催化劑」,香港都出過唔少經典嘅錢罌㗎。黛安最印象深刻嘅,就一定係渣打銀行60年代推出嘅唐老鴨同史高治叔叔錢罌喇,連渣打大中華及北亞地區行政總裁洪丕正都有一個。最估唔到嘅係,渣打又再同迪士尼合作,推出迪士尼ATM卡同存款卡。

呢一系列嘅ATM卡及存款卡,可以畀一家人一齊擁有。除咗普通ATM卡,仲有青少年ATM卡,畀11至18歲子女用,父母可以自設每日提款上限;而存款卡就可以存款同查賬,啱晒11歲以下子女。

而家喺3月30號前成功開卡,又符合相關要求,仲可以得到一個限量版史高治叔叔同唐老鴨錢罌,另外仲有迪士尼樂園禮遇𠻹。黛安已經通知咗一班迪士尼粉絲喇,各位有興趣嘅朋友都快啲申請啦!

撰文: 黛安 消息特靈八卦公關
欄名: 八卦名利場