中環健康新「煮」意

中環人日日搏殺，食得好真的很重要。新店aha幫到手，佔地兩層，環境開揚，走Causal dining路綫，自助形式點餐取餐，趁開餐讓自己唞唞氣。

食物選擇不少，有沙律、意粉薄餅、主菜及甜品等，當中有資深營養師推介，也會為部分菜式標明卡路里及箇中健康元素，好像含豐富蛋白質、Omega 3、高鈣等。既然食店主張均衡飲食，推介中環人來個便當，餐盒分三格，飯\麵包、配菜及主菜，一餐食齊碳水化合物、肉類及蔬菜，還可額外加湯及甜品，更豐富。想食Light一點，又可到沙律吧，每日6款選擇，包括菠菜米形意粉沙律、藜麥羽衣甘藍沙律、燒雜菜配羅勒香草醬，沙律的卡路里由48至242 kcal不等（每100克計算），配搭冷壓果汁\鮮果汁，好清新。

素食夠精緻

「走肉」朋友來到，有一系列Vegan美食選擇；日籍行政總廚Koji擅長做法國菜，做素食也精緻過人，賣相繽紛的水晶蔬菜批，靈感來自法式肉醬（Terrine），層層蔬菜食出不同味道。雅支竹撻坊間少見，將法國雅支竹挖空，釀入大豆做的芝士及烤波椒，清新討好。

肉類、海鮮類主菜當然亦難不到Koji，一道油浸法國鴨髀最精采，選大隻肥美法國鴨髀，以橄欖油取代傳統鴨油烹調，低溫烹調後再香煎，酥脆味美不失健康，連伴碟的煙肉蘭度豆也輕易掃清。

aha

地址︰中環德輔道中77號盈置大廈地下

電話︰2881 1811

營業時間︰星期一至六11am-10pm、星期日及公眾假期11am-9pm

平均消費︰$120

編輯：余運慶

美術：Simon