明日推出 McCafé歎夢幻士多啤梨甜品

呢排凍冰冰，但原來已經差不多係士多啤梨當造季節啦！黛安知道麥當勞由聽日（1月11日）起，McCafé會與著名日本製菓品牌BOURBON合作，推出一系列嘅士多啤梨飲品和蛋糕；今個月尾，4款全新士多啤梨味新地甜品亦都會喺甜品站出現！

幻想下寒冷天氣底下，嗌一杯軟綿嘅白朱古力奶，上面仲有甜美嘅士多啤梨醬，加上日本直送、充滿士多啤梨芳香嘅BOURBON Elise士多啤梨忌廉威化條，每一啖都好似品嘗緊濃郁士多啤梨嘅幸福滋味咁。你亦可以點一份脆卜卜又熱辣辣嘅新地窩夫，仲有碎朱古力曲奇同OREO碎，或者酸甜嘅雜莓醬畀你揀。

鍾意飲咖啡嘅人可以選擇熱嘅士多啤梨白朱古力咖啡，配埋士多啤梨蛋糕層層疊，一啖咖啡一啖鬆軟嘅海綿蛋糕，真係甜到入心！

1月25日起，仲可以歎到首次登場士多啤梨味新地窩夫筒！上面配上鬆化嘅BOURBON士多啤梨夾心餅，食之前記得影番張selfie呀！另外當然唔少得士多啤梨味新地筒、新地及麥旋風𠻹。鍾意食士多啤梨嘅朋友一定唔可以錯過呀！