郭基煇善心爆棚 助基層兒童啟潛能

新鴻基地產每年例必搞幾個慈善活動，好似無幾耐之前嘅ICC垂直跑，又同旅發局一齊搞過單車節，全部都有慈善性質，分別捐款畀和諧之家、小童群益會等機構嘅項目。為善最樂嘅新地執董郭基煇（Adam）噚日請咗一班受惠機構嘅工作人員食飯慰勞佢哋，仲搵咗幾個受惠家庭分享佢哋受助嘅經歷同得益，黛安聽完都覺得好感動！

噚日黛安同一班傳媒朋友都有去到飯局，Adam話，好多謝咁多間機構嘅努力，擺咗好多心機同資源落去新地活動嘅資助項目上，所以特登請佢哋食飯！近排全城都喺家暴虐兒事件嘅陰霾下，Adam就話，新一年希望可以見到多啲溫暖人心嘅報道。

其中一個新地資助嘅項目係「新地資優科學創意發展計劃」，好多基層小朋友雖屬資優，但就無資源去學習同埋發揮才能，呢個計劃就為佢哋提供免費嘅STEM課程，發掘佢哋嘅潛能。

育有一對資優龍鳳胎嘅招女士就同大家分享，仔女1歲時，丈夫過咗身，本身佢覺得一對仔女無乜特別，但過經學校鼓勵下參加咗計劃，開闊咗仔女眼界，更令佢哋有明確嘅目標，知道自己將來想從事咩行業。

孩子自薦加入新地

而另一位受惠小朋友嘅媽媽阿May就話，囝囝參加咗計劃後，先知道原來科學係佢強項，囝囝依家變得更有自信、主動咗，甚至夠膽叫Adam將來請佢入新地返工！我哋聽到都覺得好笑又好佩服！