袁詠儀微電影做苦媽騷演技 粉絲：好洋蔥，喊死人！

袁詠儀（靚靚）為保險公司拍攝的微電影，於日前在網上發布，化身「苦媽」的靚靚經歷家庭巨變，演活面對丈夫、女兒身患危疾的無力感。貴為兩屆金像影后的靚靚，以淚水換來掌聲，短片在兩日間勁吸過百萬點擊。很多粉絲直指睇到眼濕濕；有人則說靚靚真實生活中形象太惡死，難入戲！

繼15年的郭富城、16年的廖啟智後，今次輪到靚靚接棒演繹AIA保險公司的《愛在當下》系列第三輯，在七分鐘的微電影中帶出廣告信息。故事以真人真事改編，大賣悲情。化身堅強靚媽的靚靚，除了要照顧身在醫院的患癌丈夫，又要擔起養家重擔。

此外，她為教好女兒，更聲嘶力竭鬧爆飾演其女兒的六歲小演員Mia，其細緻演技大獲正評。不過，其後劇中的靚靚再遭逢巨變，女兒忽然驗出腦腫瘤，慘遭雙重打擊的她情緒跌入谷底，瞬間眼淚大爆發，將其影后級演技發揮得淋漓盡致，可幸最後其丈夫和女兒齊齊戰勝病魔，靚靚更誕下一子合影全家福，故事以Happy Ending告終。

出Po發放正能量

不少網友熱捧該部微電影，力讚雖是廣告，但故事大賣洋蔥超催淚，而且靚靚亦與小演員擦出火花；有口痕友卻嫌她的形象未夠慈母Feel，演繹不夠細膩。

前日，靚靚在IG分享微電影的劇照，並留言︰「家人一直是我生活的動力。只要互相支持，再艱辛的難關總可以跨過。期望這個微電影能夠讓你重新學會愛在當下。」而身在布達佩斯拍攝劇集《蝕日風暴》的張智霖，亦有在FB分享愛妻這部微電影，以示支持，更大讚好Touching。

撰文︰Steven、Pat

協力︰Terri

編輯︰黃寶恩

美術︰梁政敏