Audrey Ng
Audrey Ng

胎動停止了?!

發佈時間: 2018/01/15

胎動停止了?!

臨近預產期,心情愈來愈緊張,時刻都留意住阿B嘅狀況,以防佢提早出世。有一日,我突然間覺得「唔對路」,「點解阿B今日咁靜局嘅?」我摸咗自己個肚好耐,都感受唔到阿B郁動。當時我放緊產假,身邊一個人都無,心入面好驚,因為我記得醫生曾經話過,若BB喺兩個鐘頭內胎動次數少於十下,就要警覺。

我立即打電話畀老公,點知佢剩係識叫我「冷靜啲、再等下就有。」「家陣阿B唔郁呀,你叫我點冷靜呀?」向老公發完一輪脾氣,我決定唔再守株待兔,再次攞起電話,打去平日做產檢嘅私家診所求救,好感激醫生喺full booking嘅情況下應承睇我。於是我立即飛的士出去,期間個心「噗噗噗」咁跳得好快,我不斷祈禱,希望BB無事……

朋友安慰說,臨近分娩胎動係無咁頻密,但我內心仍難以平靜。帶住忐忑嘅心情步入診療室,直到親眼喺超聲波儀器上見到活潑依然嘅BB,我先放下心頭大石,眼淚忍唔住奪眶而出。

「無事喎!BB好健康。」醫生同我做咗個例行檢查,話BB就快40周,成長得好好,肚入面可郁動嘅空間愈來愈少,所以胎動亦變得無咁明顯;佢又同我講,BB已經落咗去盆骨,做好出世嘅準備,提醒我一旦發現自己下體見紅、穿羊水或感受到有規律嘅陣痛,只要三樣當中出現一樣,就需要去醫院待產了。

做完檢查成個人放鬆晒,胃口寧舍好。我記得當晚無事無幹,食咗餐好豐富晚飯,直至臨瞓前去廁所,我先發現自己已經「見紅」了!下期續。

(本欄逢周一刊登)

撰文: Audrey Ng 80後P牌媽咪,由懷孕280天起分享陀B湊仔歷程
欄名: B經之路