「辭職啦！」

以上幾個字，可能是近日網民評及「鄭若驊僭建門」時，用得最多的留言。今次真心同意。

鄭女士第一次就事件解畫後，姚鈴就說，當一個律政司司長的誠信已經破產，怎能再待下去？解畫解到左閃右避、不盡不實，刻意只說在屋內沒再後加改動，姚鈴心諗，即是屋外有啦。第二次解畫，印證了推測，只是鄭女士又古古惑惑輕輕帶過，說屋外後加那度門不是她做的。唔，咁又是否賢夫婿做的？奇在記者居然不再追問，當然疑點太多，時間太少，想問都沒有機會，而「太忙論」一出，試問誰還再會認真對待你的回應。

事實是情況惡劣到連「好打得」的林鄭都辯無可辯。平日理直氣壯、口舌便給，這次詞窮到說來說去只會叫人包容一個明顯知法犯法的司長，不止軟弱無力，那句「如果呢個係事實，咁就惟有係事實」，語無倫次的程度，直逼阿嬌那句「個個都拍拖，唔通個個都想拍拖咩」。林鄭硬朗半生，何苦委曲求全。再不壯士斷臂，今次鄭女士拖累的不止林鄭一人，而是整個特區班子。這不是反對派為反而反的惡言，是非常中立、正常，以至愛國人士都認定幫唔過，幫你等如害你的一枚原子彈，3‧11補選在即，你諗你。

（本欄逢周二、四刊登）