海港城「觀鳥」 紙雕雀栩栩如生

香港雖然地方細細，但因位處候鳥遷徙路綫，所以又有雀鳥天堂嘅美譽。如果你平日有觀鳥嘅習慣，我諗你對以下呢個展覽都一定會感興趣，因為負責呢個展覽嘅哥倫比亞藝術家Diana Beltran Herrera，同樣係雀鳥愛好者，一直醉心研究點樣將一隻隻獨特嘅雀鳥，幻化做手工精細、幾可亂真嘅紙雕，希望藉此留住美態。

今個月底開始（25/1-25/2），佢將會喺海港城LCX舉辦首個香港個人展覽「鳥語花香：紙雕藝術展」，帶來多幅作品及創作短片，包括佢特意為今次展覽創作、極富中國傳統特色嘅立體紙雕組畫《Asian Garden》。呢幅畫以鴛鴦為主體，並以牡丹、荷葉等做背景，兩隻鴛鴦身上超過4,000條羽毛，分別以多種高質藝術色紙製成，部分更係人手上色，睇落漸變細緻、層次分明，單係一隻鴛鴦就要花上3個星期製作，過程非常繁複。

喺展覽入面，大家仲可以睇到長冠八哥及王風鳥等極度稀有嘅雀鳥。相信對鍾意雀仔嘅人來講係幾特別嘅觀鳥體驗。