萬能原汁煲 40分鐘煮出佛跳牆 蘇玉華讚好用

最近黛安經常進出信興位於佐敦的廚藝中心，對上一次去是跟黃淑儀學煮餸；前日又再去過，不過今次唔係學廚，而係應信興老闆David（蒙德揚）邀請，出席佢哋新代理的Panasonic萬能原汁煲的試菜會。

自動炒餸 受熱均勻

講起呢個煲就犀利咯，黛安對佢可謂一見鍾情，事關佢真係功能多多，我最鍾意佢的自動攪拌功能，將洗乾淨的食材放入去，內置攪拌葉片就會以每分鐘20下的次數幫你自動炒餸，每次一下左、一下右，令食物均勻受熱；唔單止咁，佢仲內置46份食譜，可以在短時間之內煮出多款高難度菜式。

前日David就請咗「美女廚神」蘇玉華即席示範利用呢個煲，炮製出佛跳牆、紅燒肉、響螺燉雞湯及紫米露等六道菜。好似佛跳牆呢啲咁棘手的菜式，只需放晒所有材料入去，40分鐘就有得食，鍋內蒸氣及熱力會在全密封環境循環，就算過程中一滴水都無落過，都可煮出滴滴精華，認真無得彈。

聽蘇玉華講，上個月David率先畀咗部實驗版原汁煲佢試用，於冬至當日仲用嚟整羊腩煲。佢話平日啲羊肉起碼要炆三、四個鐘，如今一個鐘就搞掂，大讚個煲方便易用，煮出來的餸菜仲原汁原味𠻹！

飯後大會仲安排咗大抽獎，大會原本請蘇玉華幫手抽，不過蘇玉華最終都係交番畀David負責。David出來後講笑話，因為蘇玉華簽代言人合約時，工作無寫明包抽獎，所以都係等佢嚟喎。大家聽到之後都哈哈大笑。