再夥拍陳煒 黃智賢日日好食神

黃智賢昨日與陳煒及車婉婉等為新劇《好日子》進行開工拜神儀式，雖然黃智賢與陳煒這對舊拍檔在劇中誓不兩立，但戲外就非常友好，陳煒更經常「美女廚神」上身，炮製美食及靚湯給眾演員品嘗，十分窩心。

黃智賢和陳煒於00年曾合作拍攝亞視劇集《美麗傳說》，兩人相隔17年再合作，默契依舊，但黃智賢在劇中就慘遭陳煒喪罵及用搶指嚇，陳煒笑言︰「所以要整番啲好嘢食畀佢囉！」

淑儀姐加入下廚

黃智賢亦開心表示拍劇期間幾乎日日有「食神」。「佢成日都會煲湯同糖水畀劇組人員，真係好有口福。」陳煒亦坦言剛開劇未算最忙，所以一有時間就煲靚湯慰勞大家。「我同GiGi姐（黃淑儀）輪流煮，遲啲畀個菜單你哋，隨便點菜。」另外，去年誕下兒子BBQ的車婉婉，表示九個月大的囝囝已開始學走路，她說︰「好驚屋企嘅家居陷阱會令佢受傷。」

對於在節目《流行經典50年》上獻唱經典歌《會過去的》掀起網民熱話，婉婉開心表示︰「最初都好驚，因為好耐無唱過歌，生完仔後唔知仲識唔識得唱歌，無諗過首歌一出街就有十幾萬點擊率。」

撰文︰倪小珊

編輯︰林梓添

美術︰招潤洪