划艇34日 橫渡大西洋 汕大美少女破世界紀錄

黛安並唔係運動健將，每次見到運動員獲獎都好佩服！噚日收到消息，獲李嘉誠基金會資助嘅汕頭大學，早前派出4位學生組成划艇隊「功夫茶茶」，出征被視為全球最艱辛嘅3,000海里「橫渡大西洋挑戰賽」，結果一次過破晒4項世界紀錄，認真威水啊！

誠哥用衞星追蹤打氣

4位同學分別係來自廣東省嘅陳鈺麗、黎曉冰、梁敏甜，以及來自河南省嘅孟亞潔，佢哋係划渡大西洋史上最年輕嘅參賽隊伍，平均年齡只有23.5歲。4位美少女剛剛入學時，一定無諗過自己可以完成呢項創舉。聽公關姐妹講，佢哋全程幾十日都係艇上度過，包括食飯、休息。到咗第8日賽事，仲連續幾日遇上45海里強風，黑夜中雷電交加，海面翻起20呎巨浪！原本以為可平安度過，但到賽事後期，卻收到兩次7.8級地震同海嘯警報，實在驚險萬分！據講年輕時好鍾意划船嘅基金會主席李嘉誠都好緊張，都每日用手機嘅衞星追蹤程式睇進度、緊貼賽事，遠距離幫佢哋打氣。

最終順利完成賽事，皆因佢哋四個人一條心！每個緊急關頭，佢哋都抱住共同完成目標嘅理念，無論輸贏都互相支持。最後排除萬難，於噚日朝早8時13分，以34天13小時13分，打破兩年前嘅世界紀錄40天8小時26分，仲贏得女子隊冠軍！