學生哥做老闆 鑽石山賣環保創意用品

雖然年宵市場下個月先開幕，若然大家呢幾日想行下市集，黛安推介你今日起一連三日（19-21/1），到荷里活廣場舉行嘅「趁墟做老闆」展銷會逛逛。話說呢個活動今年已經係第六屆舉行，共有42個攤位參展，今次以環保創意為題，售賣多種環保及健康產品。最難得嘅係，所有檔攤嘅老闆都係學生哥！

早前超過1,000位來自42間中學嘅學生，喺「學校起動」計劃支持下初嘗創業滋味，由寫計劃書、構思產品到攤位設計，統統由學生包辦。籌備咗足足四個月，今日終於開檔。噚日黛安率先睇過主打產品介紹，發現呢班同學仔真係好有計。其中有學生利用棄置抹手紙筒，加上由舊電腦拆出來嘅小風扇和USB線，自製出能夠過濾甲醛和揮發有機物VOC嘅小型空氣淨化器；亦有人用咖啡渣來整泡泡皂，甚至以紙包飲品盒做利市封。攤檔所賺款項會用來幫佢哋所屬學校添置物資。咁有意義，大家記住去支持啦！