經濟日報集團30周年 筵開近百席聯歡

十年樹木，百年樹人。一門事業做足30年，且要業務蒸蒸日上，一啲都唔容易！黛安上星期六（20/1）去咗香港經濟日報集團30周年晚宴，喺沙田石門富臨皇宮足足筵開98席，過千名員工濟濟一堂，仲有差唔多五分一人係等住上台攞長期服務獎，真係「業務發得大，人才留得長」啦﹗

同事上下一心

所謂萬事起頭難，經濟日報集團主席兼CEO馮紹波致辭時話，開頭做報紙真係遇到好多困難，好彩得到一班同事上下一心，最終苦盡甘來。馮生仲話，集團要成功，關鍵都係人才，承諾今年「有貢獻同事一定有人工加，貢獻多啲，收穫就一定會多啲」。馮生當晚仲如數家珍講出集團有成1,470個全職、50個兼職員工，就知道公司幾重視下屬啦。晚宴氣氛都相當高漲，有啤酒競飲大賽同歌唱比賽助興，飲得杯落之餘仲聽出耳油，好似去咗嘉年華會一樣咁開心。

去到大抽獎，禮物一樣豐富，除咗有應晒節的「足金金狗」畀員工帶番屋企賀年，又有勁受歡迎嘅任天堂遊戲機Nintendo Switch、iPhone X、Dyson吸塵機、暖風機同風筒，禮物總值成$30萬！

同枱嘅《晴報》同事中咗3日「特別有薪假期」獎，又有人中$1萬蚊現金獎，全晚高潮迭起，大家都盡興而歸！