梁錦松孖蒙德揚 幫長者做節兼加餸

農曆新年好快就到，黛安日前就去咗惜食堂舉辦嘅「區區齊做節」啟動禮暨慈善團年午宴，同一班公公婆婆一齊食飯提早做節，活動更獲信興教育及慈善基金贊助一齊推行，目標係2018年嘅8個節慶日子，為惜食堂所製作嘅熱飯購買額外應節食材，幫長者加餸，令佢哋係節慶過得更加溫暖。

當日惜食堂主席Antony（梁錦松）、信興教育及慈善基金主席David（蒙德揚）及安老事務委員會主席林正財醫生等亦親自去現場主持，仲落手落腳舀飯畀在場超過250名長者，黛安喺現場都感受到歡愉嘅新年氣氛。Antony話好多謝信興支持，捐出唔同嘅電器畀惜食堂，又慷慨捐款推行今次活動，令節慶歡樂散布到每區角落。David就希望透過活動令有需要長者食得豐足，又透露信興今年11月將於會展舉行展覽，當中有配合長者需要而度身訂造嘅樂齡科技家居產品，希望令更多人關注長者居家安老議題。