參加「生態保衞賽」 贏海洋公園年票

做運動有益身心，如果仲可以推廣埋保育意識，咁就真係一舉兩得。黛安講緊嘅就係香港海洋公園保育基金「生態保衞賽2018」慈善跑！呢項咁有意義嘅運動，依家已經可以喺網上報名（http://www.opcf.org.hk），2月9號就截止喇，比賽將會喺3月4號科學園舉行。

今次比賽會有三個組別，分別係10公里計時障礙賽個人組、3公里同樂組同埋10公里計時障礙賽企業組冠軍杯。公關姊妹同黛安講，10公里計時障礙賽嘅男、女子組冠軍可以得到豐富嘅獎品，包括海洋公園「智紛全年入場證」優越卡會籍一年、雙人自助晚餐一份同埋Brooks跑鞋一對。黛安仲知道，香港首位男子花劍世青冠軍張家朗，都會參加3公里同樂組嘅比賽𠻹！呢個比賽咁有意義，黛安打算約埋班好姊妹報名，齊齊做「保育英雄」！