由綠豆加熱凝固 $72歎植物蛋全餐

黛安身邊愈來愈多非食素嘅朋友，都因關注健康同環保問題，選擇可持續性更高嘅健康食品，而最近健康飲食界最矚目嘅就非植物蛋Just Scramble莫屬喇，呢隻蛋係由曾獲李嘉誠投資嘅美國生物科技公司JUST研發，今日正式登陸亞洲，大家今後可以喺Green Common食得到喇！

高蛋白質 零膽固醇

夏威夷名廚Kaimana Chee噚日喺發布會上即席示範炒植物蛋同奄列，黛安湊熱鬧去試食啦，發現炒出嚟嘅植物蛋，同真雞蛋係一模一樣味道，加埋黑松露、香草等，味道一流！

JUST聯合創辦人兼CEO Josh Tetrick話，團隊分析過好多種植物，最後發現綠豆嘅質感、味道、加熱後凝固嘅狀態都同雞蛋最似，且高蛋白質，零膽固醇、激素、抗生素，耗水量同碳排放都更少，係健康環保之選。

用植物蛋入饌嘅全日早餐同日式照燒碗，今日喺Green Common 4間分店有得食喇，分別只係賣$72同$82！除咗植物蛋，仲用上牛油果、蟲草花、紅米等食材，好有營養，注重健康嘅姊妹必試。而蛋漿預計短期內會喺香港有得賣，推出初期價錢約比普通雞蛋貴3成。

Green Monday聯合創辦人楊大偉預計，好快會推出植物蛋版本西多士同蛋牛治，配合其他健康材料，連本來好邪惡嘅西多士都可「改邪歸正」！