$50起入場 海洋公園夜間歌酒節 歎手工啤酒睇表演

海洋公園又有新活動！黛安聽聞3月10日到4月2日會推出夜間歌酒節，一連4個周末同復活節假共10天，園內會有手工啤酒、各地特色嘅美食出售，只要買$50電子餐飲代幣，就可以在晚上6點半後入場兌換代幣享受美食。

除咗有手工啤酒飲，每晚仲有兩場45分鐘嘅音樂會，聽講唔少本地人氣歌手同樂隊，例如許廷鏗、盧巧音、陳柏宇、衛詩、周國賢、側田、ToNick、Shine都會輪住演出，門票只係$180或$280，今個星期五早上10點喺購票通網站就正式開賣喇，各位Fans記得去撲飛呀。黛安已經約定朋友到時去玩番晚！

海洋公園商業營運執行總監鍾志超（Perry）同黛安講，上年佢哋推出咗夜間美酒佳餚盛薈大受歡迎，所以今年再推出夜間歌酒節，而且規模更大，會有超過30個飲食攤位，提供獨特口味嘅手工啤酒。海洋公園管理及演藝節目執行總監吳守堅（Timothy）話，今年有咁多當紅歌手同樂隊參與，仲有唔少知名餐廳加盟坐鎮，估計入場人次會創新高。

公關姊妹仲提醒黛安，今年歌酒節有20場音樂會，每場可容納900人，因為有網上劃位服務，即係愈早買飛揀到靚位嘅機會愈大。買咗音樂會門票仲會送$30電子餐飲代幣，同精美啤酒杯一隻！