領展6個停車場 接受電子支付喇！

平日shopping，黛安成日都用到電子支付，貪佢方便又快捷。領展旗下嘅手機應用程式「泊食易」（Park & Dine），都推出咗首個兼容電子支付同泊車功能嘅手機平台。

黛安聽領展行政總裁王國龍講，黃大仙中心同樂富廣場等6個領展停車場會先做試點，日後大家揸車去呢幾個停車場，打開「泊食易」App，將入面嘅QR code放喺閘口掃描器底下scan，就可以透過9大電子支付方式畀錢，包括支付寶香港、Android Pay、Apple Pay、銀通、萬事達卡、八達通、繳費靈、Visa同微信支付，對車主都方便好多！領展目標喺兩年內，將「泊食易」嘅電子泊車功能，覆蓋至旗下超過30個時租停車場。

同領展公關姊妹傾開先知，原來「泊食易」App喺2016年5月推出至今，已有超過23萬次下載量，而且功能多多，包括食肆遙控取票、停車場實時車位供應資訊等。