迷上一個又一個韓國男星

已經很久沒有去戲院看電影了。上星期去了看《與神同行》，好睇！更迷上了演員河正宇。這齣電影的故事當然好，但這班演員的神級演技更是令我拍案叫絕。

回家後，即刻追看回之前河正宇所演過的《恐怖直播》和《隧道》等等，睇到愛上他，睇到那一晚我為了他而發綺夢呢！

其實從90年代起，韓國電影發展勢頭迅猛，不斷湧現很多令我很喜歡的高水準佳作，計有︰1999年韓國的《生死諜變》、2001年的《我的野蠻女友》、《朋友》、2003年的《假如愛有天意》等等。之後的韓國電影，無論是題材和內容都更加多元化，充分體現了韓國電影的百花齊放和興旺發達。

我也算是娛樂圈中人，所以好少會迷偶像，但每當看到令我投入的韓劇或韓國電影，就會像中了降頭般，不知不覺愛上戲中的主角。《主君的太陽》，頭一集看男主角蘇志燮，總覺得他的樣子好像有些不順眼，但看多兩集之後，我這個中女的情竇已為佢而開！睇《殺了我，治癒我》的池晟，還有《好雨時節》的鄭雨盛，他們的精湛演技亦撻着了我。

上次到韓國，朋友介紹了李瑞鎮給我認識。當時我並不知道他是藝人，一齊玩了一個晚上，但沒有任何feeling。回港後有機會給我看回之前他演的韓劇《戀人》和《結婚契約》，再加上綜藝節目《花樣爺爺》，我又迷上了佢！

好彩timing幫咗我。如果讓我先看了他的作品，迷上他之後才遇上他的話，我一定會對佢飛擒大咬，㩒都㩒唔住！我會show畀佢睇我呢位「阿豬媽」如狼似虎嗰一面！到時就真係羞家死！善哉善哉，大呼好彩，好彩。

所以我認為作為一個演員，努力固然重要，但都比不上你做到一個迷死人的好角色；畀你做到呢個角色，想唔紅都幾難！

（本欄逢周四刊登）